Harita keur ngajar di salah sahiji sakola di Bandung, kuring ditaros ku murangkalih: naha leres Syiah sasar? Kuring balik naros: naon anu disebat sasarna? Anjeuna nyebatkeun anu aya dina internet dugi ka kasus di Sampang-Madura. Sim kuring seuri. Ku simkuring dijantenkeun PR ka murangkalih supados milarian aosan atanapi buku-buku ngeunaan Syiah anu ditulis ku urang Syiah.
Dina palajaran salajengna kuring langsung dialog sareng murangkalih perkawis aosan anu kantos dibaca. Sim kuring ngawaler sabisa-bisa sabab kuring lain ahli dina widang teologi sareng mazhab. Ngan diguar ti sajarah anu kantos diajar di UIN Bandung sarta maosan buku-buku Kang Jalal, Muhammad Tijani As-Samawi, Syarifuddin Musawi, sareng Buku Putih Mazhab Syiah anu diterbitkeun ku ABI (Ahlulbait Indonesia).
Sim kuring mah teu ngarti naha beut aya keneh urang Islam anu terus merangan Syiah atawa urang Islam anu nyepeng paham mazhab Ahlulbait. Mun ditoong dina internet atanapi buku-buku jieunan jalma-jalma nu mikangewa ka Ahlulbait, geus lapuk alias kabeakeun bahan keur merangan mazhab Ahlulbait.
Jalma nu nyerang Islam Syiah (Ahlulbait) biasana nyebatkeun sasar. Salain ti eta wantun oge nyebatkeun hadis ghadir khum sareng hadis tsaqalain henteu soheh. Kitu deui riwayat asbabunnuzul surah azhab ayat 33 nu ngajentrekeun Ahlulbait nu suci nyaeta Kangjeng Nabi, Sayidah Fathimah, Imam Ali, Imam Hasan, jeung Imam Husain.
Seueur ahli hadis jeung sajarah nu nalungtik sohehna riwayat ahzab ayat 33, ghadir khum, jeung tsaqalain. Mun teu percanten mah mangga geura ilikan buku Dua Pusaka Nabi saw: Al-Quran dan Ahlulbait karya Ali Umar Al-Habsyi (Jakarta: Ilya, 2007) atanapi Syarafuddin Mussawi nu jejerna Murajaat (Dialog Sunnah Syiah) nu parantos ditarjamahkeun almarhum Ustadz Muhammad Baqir sareng diterbitkeun Mizan.
Dina dua buku eta eces kuatna hadis atawa riwayat perkawis Imam Ali bin Abi Thalib karamallahu wajhah anu tos ditangtukeun janten Khalifah Islam sabada Kangjeng Nabi pupus.
Malihan mah jentre imam-imam anu janten khalifah dugi kiamat. Geus sapuk urang Ahlussunah jeung Ahlulbait yen khalifah atanapi imam akhir zaman teh Imam Mahdi Al-Muntazhar turunan Sayidah Fathimah binti Muhammad saw.
Malihan mah dasar Islam nu sering diagulkeun: Al-Quran jeung Hadis, sakedahna mah ditalungtik deui hadisna. Sabab eta dadasar teh mun diilikan dina kitab hadis nu soheh mah teu aya. Quran jeung hadis riwayat aya dina kitab fikih Muwatha kenging Imam Malik bin Anas sareng kalebet hadis nu kurang kuat dina runtuyan jalma-jalma nu narima hadis. Justru hadis anu nyebatkeun Kitabullah wa Itrah Ahlulbait nu jentre sareng aya dina kitab-kitab hadis urang Ahlussunah (dadasar sumber kaislaman eta anu kiwari dicepeng urang Islam Syiah).
Ngan dugi kiwari kuring teu ngarti naha jalma-jalma nu ngewa ka urang Islam Syiah (Mazhab Ahlulbait) embung nalungtik deui kana sagala dalil nu nyasarkeun urang Islam Syiah. Kasus Sampang Madura jeung Bangil (Jawa Timur) sidik urang Islam Syiah ditandasa jeung harta bandana diruksak. Jalma nu ngaruksakna ngaku urang Ahlussunah. Sanggeus ditalungtik jentre kalakuan anu henteu nyunah alatan oknum ulama di MUI Jawa Timur anu nyebatkeun sasar sareng lain ajaran Islam.
Mun dibandungan mah maranehna bisa kaasup korban salah informasi. Maranehna percanten ka jalma nu kaelmuanna henteu kaciri jeung henteu diaku sacara akademis. Tah didieu kuduna mah maranehna sadar jeung nalugtik deui. Tapi ketang embungeun mun kudu nalungtik mah apan biasana oge nampi bae ti para kiai anu di masigit-masigit. Teras bae diteureui buled. Tah anu kieu mah kedah ditingkatkeun widang kaelmuan na. Kedah diajar deui na agama katut madhab-madhabna.
Sok ah ayeuna mah gampil cara diajarna. Mun hayang apal ngeunaan Islam madhab Syiah, kantun nepangan Assatidz ti ormas Ahlulbait Indonesia (ABI) sareng Ikatan Jamaah Ahlulbait Indonesia (IJABI). Tah sakitu. Hatur nuhun. *** (ahmad sahidin)