Tadi wengi dugi kiwari
kuring keuna nyeri beuteung. Biasa alatan tuang sareng anu lada. Kamari uih ti
sakola sareng pun bojo ngahaja barangtuang gurame bumbu rica-rica. Habeuk bae
dituang. Kirang langkung ti sajam, kontan karasa kukurileubeukan patuangan. Biasa ka
jamban. Lima menit saatos ti jamban karaos deui. Teras bae pulang anting ka
jamban. Mun teu salah mah dugi ka langkung lima balikan.
Tadi oge subuh bulak
balik ka jamban. Teras dugi ayeuna. Tangtos dinten ieu kuring teu ka sakola. Kabayang
atuh mun keur di sakola hayang ka jamban sareng bulak balik, tangtos ngaganggu
aktivitas kuring di sakola. Kusabab kita kuring ngahaja libur heula. Di imah
bae.
Mun diteungeutan mah
nyeri beuteung teh kawilang panyakit anu biasa karandapan ku simkuring mun geus
nuang sarupaning anu lada sareng seuhah. Sanajan ingeut yen mun tuang sambel
bakal nyeri beuteung, anggeur bae kuring sok kana sambel. Teuing atuh dina
pikiran so kaya pangbeubeurah: moal nyeri beuteung saeutik mah. Kitu anu aya
dina pikiran kuring. Teras bae dituang. Antukna bulak balik ka jamban sareng
ngalempreh sabab kaluaran teras.
Baheula nuju keur gawe
di Daarut Tauhiid, Ledeng Bandung. Keur dina beus Damri, di daerah satasion
kareta api, beuteung kuring ngarasa kukurilibeukan. Tandaning hoyong miceun. Eureun
tengah jalan tina Damri. Teras milari susukan alit. Ngan orokaya nembrak. Era ku
batur anu ngaliwat.
Luak lieuk neangan tempat. Palebah gang aya hiji imah anu
boganan keur araya. Kuring nyarios hoyong ngiring ka jamban. Paribumi teras bae
nuduhkan jamban digigir bumina. Bus bae. Ngan orokaya, dina calana kuring geus
ngaburusut. Tangtos pinuh dina calana jero. Atuh langsung bae dibanjuran. Teras
bae dilebetkeun kana tas saatos teu aya anu nempel. Sanggeus amitan
nganuhunkeun, kuring neangan wadah runtah. Lung bae eta calana jero dipiceun.
Pangalaman model kitu
lain sakali karandapan. Mun diitung mah leuwih lima kali. Tah kusabab embung
karandapan model kitu, kuring milih cicing di bumi bae mun keur katarajang
nyeri patuangan.
Biasana mun keur nyeri
patuangan, kuring ngan ukur nginum cai enteh pait teras ngabubur. Barangtuang oge
sakedik. Sabab mun dieusi sok hoyong aya anu dikaluarkan deui. Janten kedah ka
jamban deui. Tah kitu. Cag...
Jumaah, 14 Agustus
2015, jam 9.30