Bagja Pupus keur Ibadah

Senen malem salasa kamari, aya bewara ngalangkungan pangeras suwara ti masjid cakeut. Ngabewarakeun aya anu pupus, nyaeta anu sok meresihan masjid jeung ngawulang barudak ngaos sabada maghrib.

Anu pupus teh parantos sepuh yuswana genep puluhan. Anjeuna katelahna Bu Haji. Tatanggi na nyebatkeun Bu Haji rajin puasa sunah (Nabi Dawud as) jeung anu pangpayunna mun sumping pangaosan ibu-ibu di masjid. Saur tatangina, Bu Haji pupus sabada buka puasa (ifthar) sareng shalat maghrib. Anjeuna ngaraos kirang sehat teras bae mulih ka bumi. Bu Haji pupus, kapendak ku kulawargina nuju nyepeng Al-Quran. Rupina nuju maos Al-Quran teras dipundut ku Gusti Allah Ta'ala.

Tarikh Kangjeng Nabi: Wahyu jeung Syiar Islam

Masih keneh nyutat ti Ath-Thabari, ayeuna ngeunaan nampi wahyu atanapi diangkeunna Kangjeng Muhammad bin Abdullah janten Rasulullah saw. Disebatkeun Kangjeng Muhammad bin Abdullah nampi wahyu sasih Ramadhan ping 17.

Ibnu Ishaq nerangkeun ti Wahb bin Kaisan, Kangjeng Muhammad dina sasih Ramadhan nyepi di Guha Hira. Dianteran kulawargi kanggo tuang leueutna. Dina hiji wengi Kangjeng Muhammad ngimpen disumpingan mahluk anu nyandak salambar kaen dibaj anu diseratan. Kaen eta ditempokeun ka Kangjeng Muhammad. Saterasna Kangjeng Muhammad maoskeun eta seratan anu diwulangkeun ku eta mahluk. Kangjeng Muhammad gugah bobo. Teras ngaraos aya anu lebet na jero hate. Diaoskeun deui gampil norolang henteu sapertos ngawitan kedah diaping. Anu dioskeun teh sidik Alquran surah Alaq ayat hiji dugi lima. Kangjeng Muhammad kaluar ti guha, celengkeung aya sora anu nyebatkeun Kangjeng Muhammad teh Rasul Allah jeung ieu kawula malaekat Jibril. Disidik aya mahluk sapertos anu aya na impenan anu geus ngawulangkeun Alquran. Saatos ngadugikeun mah leungit eta malaekat Jibril.

Riwayat sanesna anu diserat ku Ath-Thabari nyebatkeun sasih Rajab ngan henteu aya kapingna. Kenging wahyu di Guha Hira. Malaekat Jibril ngajarkeun surah Alaq ayat hiji dugi lima. Dina riwayat sanesna, Kangjeng Nabi kenging wahyu dinten senen. 

Resensi buku Islam: Sejarah Pemikiran dan Peradaban

Simkuring nembe beres maca buku anu diserat ku Fazlur Rahman. Doktor widang filsafat Islam lulus taun 1949 ti Universitas Oxford, Inggris. Disertasi na perkawis filsafat Ibnu Sina. Rahman urang India anu janten dosen di Universitas McGill University, Montreal, Canada. 

Anjeuna di nagari Canada janten professor ahli kaislaman. Seueur pisan karangan anu atos janten buku. Diantawis na: "Islam", anu medal taun 1979. Buku ieu kantos ditarjamahkan kana bahasa Indonesia anu diterbitkeun Pustaka ITB. 

Kapungkur simkuring kantos maos eta buku. Hilap deui taunna. Ngan kiwari eta tarjamah buku Fazlur Rahman teh medal deui ku penerbit Mizan, Februari 2017. Jejer bukuna Islam: Sejarah Pemikiran dan Peradaban.

Tarikh Kangjeng Nabi: Ti Alit dugi Laki Rabi

Dina kitab tarikh anu diserat ku Ath-Thabari aya riwayat ngeunaan Nabi Muhammad Saw nuju alit dugi laki rabi. Dicarioskeun Kangjeng Muhammad nuju alitna kantos ngangon domba anu kulawargi Halimah binti Sa'diyah. Dina kitab Al-Barzanji dicarioskeun nuju ngangon domba Kangjeng Muhammad ieu ka sumpingan malaekat anu teras meulah dada jeung meresihan kokotor anu aya dina hate. Perkawis ieu aya multitafsir ngeunaan nyata henteuna.

Ath-Thabari nyarioskeun Kangjeng Muhammad nuju alit kantos nyuhunkeun ka ibu asuhna hoyong ningal hiburan anu waktosna sonten ka wengikeun. Anjeuna sareng anu sanesna anu saantragan angkat ka tempat eta hiburan. Bari ngantos eta sumpingna hiburan, Kangjeng Muhammad nyarande na hiji tangkal korma. Teras bae kulem. Pas deur hiburan digugahkeun ku babaturanna teu hudang. Malahan tibra kulemna.