Hal eta dumasar kana hadis yen aya dua welas jalmi anu baris janten pampingpin: Ali bin Abi Thalib, Hasan bin Ali, Husein bin Ali, Ali Zainal Abidin (putra Husein bin Ali), Muhammad Baqir (putra Ali Zainal Abidin), Jafar Shadiq (putra Muhammad Baqir), Musa Kadzim (putra Jafar Shadiq), Ali Ar-Ridha (putra Musa Kadzim), Muhammad Al-Jawad (putra Ali Ar-Ridha), Ali Al-Hadi (putra Muhammad Al-Jawad), Hasan Askari (putra Ali Al-Hadi), sareng anu pamungkas: Imam Mahdi (putra Hasan Askari). Eta pamingpin Islam sabada Rasulullah saw numutkeun Syiah Imamiyah atanapi Itsna Asyariyah. Aya deui Syiah Zaidiyah, Ismailiyyah, jeung sajabina. Ngan anu seueur umatna mah ukur Syiah Imamiyah.
Numutkeun urang Sunni, Kangjeng Nabi hanteu nangtoskeun otoritas dina kapamimpinan Islam. Kumargi kitu alim nampi kana eta pituduh sanajan aya dina hadis. Aranjeuna yakin yen pamingpin saatos pupus Nabi Muhammad saw mah urusan umat. Sanes urusan Kangjeng Nabi.
Kitu deui urang Wahabi, nolak ka pamadegan urang Syiah jeung urang Sunni. Numutkeun urang Wahibi: jalmi anu teu ngiring Quran sareng Sunah geus kaluar ti agama Islam. Ngan dina eta perkara langki aya panjelasan dalil anu kiat perkawis cepengan Quran sareng Sunah. Sabab mun nalungtik hadis mah anu kiat dina sanad sareng matan hadis, nyaeta riwayat tsaqalain: Kitabullah wa Itrah Ahlulbait.
Sanes eta wae anu janten bahan guntreng. Malihan papada urang Sunni silih bintih perkawis taraweh tiap sasih romadhan. Anu shalat taraweh 23 rokaat, aya anu wantun nyebatkeun sasar kanu shalat taraweh 11 rokaat. Ceuk urang Wahabi anu tahlilan jeung marhabaan disebat teu nyunah jeung hanteu gaduh conto ti Nabi Muhammad saw dina ibadahna. Ngan tacan aya soteh anu nyebatkeun sasar ka jalma-jalma anu nyarekan jeung ngafirkeun batur anu beda dina paham agama.
Pabentar paham agama
Pabentar paham dina agama, keur simkuring hanteu janten pasualan. Sapanjang make metodologi sareng elmu teras dilakonan ngaliwatan riset/panalungtikan ilmiah. Sareng eta hasil panalungtikan ilmiah tiasa kalebet nambih khazanah kaelmuan dina agama Islam. Ngan orokaya papada urang mah aya bae nu sok resep ngamasalahkeun. Malahan disebatna sasar mun teu sarua jeung paham manehna.
Disebatna mahiwal mun teu ngiring kana
pahamna. Kitu laku numutkeun simkuring alus mun ngan hirupna sosorangan di
leuweung. Ngan ari keur nu hirupna jeung batur selembur jeung sanagara mah mawa
kareup sorangan kitu kacida bahaya. Sabab bakal nimbulkeun balukar nu kacida
gede mamalana keur kahirupan sareng katengtereman urang sadaya salaku umat
manusa di dunya.
Kukituna simkuring dugi ayeuna tetep percanten yen urang kedah miheulakeun atanapi mayunkeun akhlak batan fikih. Urang Islam ayeuna sakedahna mayeunkeun kahadean batan papasean. Sakedahna ngaheulakeun silaturahim batan silih salahkeun. Mayunkeun kapentingan nu pangaruhna ageung keur urusan umat batan kapentingan nyalira atanapi golongan Islam.
Mayunkeun akhlak tiasa diterapkeun dina urusan ibadah jamaah samodel Idul Adha jeung Idul Fitri sarta shaum romadhon. Dina hal ieu urang tiasa ngiring anu mayoritas supados henteu kagok kaditu kadieu dina urusan babarayaan. Teras supados henteu timbul omongan ti batur salembur pedah urang teu guyub jeung batur. Apanan sami ari dina ibadah mah ka Allah.
Eta pamendak simkuring dumasar kana buku Dahulukan Akhlak Di Atas Fiqih yasana Jalaluddin Rakhmat (buku medal taun 2007). Ngan tiasa sakitu anu tiasa didugikeun ku simkuring. Manawi katampi. Bilih kirang pas kana manah, atanapi aya nu bade disawalakeun, mangga tiasa langsung bae nyerat dina lolongkrang dihandap. Supados simkuring kenging pangaweruh ti balarea.
Estuning ieu tawis diajar. Insya Allah simkuring nampi mun aya anu bade masihan wejangan. Seratan anu diluhur tiasa kasebat ngan emutan sareng pipikiran simkuring. Hapunten bilih kirang merenah. Mugi tiasa katampi sareng janten nambih pangaweruh dina agama.
Allahumma shalli ‘ala Sayyidina Muhammad wa 'ala aali Sayyidina Muhammad
Allahumma shalli ‘ala Sayyidina Muhammad wa 'ala aali Sayyidina Muhammad
Allahumma shalli ‘ala Sayyidina Muhammad wa 'ala aali Sayyidina Muhammad
***
(Ahmad Sahidin)
Allahumma shalli ‘ala Sayyidina Muhammad wa 'ala aali Sayyidina Muhammad
***
(Ahmad Sahidin)